Balak Bisaya: Tagingting sa Pasko

Kabulanan nasad sa Ber, kun kanus-a tanan nangandam,
Mga inaanak preparado na sa listahan sa mga ganahan,
Para sa ilang mga ninong ug ninang nila nga panilnganan,
Maong sa mga pinoy-anan sa ninong ug ninang nag-atang-atang,
Kay ubang ninong ug ninang sa laing lugar sila magpasko man.

Mga utangan nagtago-tago na sa mga gipanghulaman,
Kay sigurado panahon nasad sa pagpaningil kay bunos ihatag man.
Daghang mga aktibidades nga pasiugdahan sa mga opisyal,
Mapasiyudad, baranggay or sa mga ginagmay nga sitio man,
Para magpa-alegre sa adlawng natawhan sa anak sa Diyos amahan.

Mga katoliko, o laing relihiyon man, iya-iya ang diskarte sa pagselebrar sa kapaskuhan,
Ang uban magtapok-tapok ug sa kabalayan mangaroling ug mangambahan,
Kauban ang mga suud nga kahigalaan ug kasilinganan pati na kaliwatan,
Hudyaka ang kadalanan tungod sa kataw-anay ug  sinungugay sa tanan,
Dinuyugan sa tinagingting sa pasko ug mga kantang pang-ambahan,

Mga kaliwat sa halayong dapit magkatapok-tapok sa pagsugat sa pasko,
Magkantahay, kataw-anay ug kinamustahay ug uban bisi tunod sa baso,
Kay dili man mawala ang tagay labi na kun ang kalakin-an na ang maggrupo,
Samtang walay hunong ang kusina sa pag-aso kay mga nanay bisi pud didto,
Nagpreparar sa mga putahe nga gihinamhinam nga matagamtam panahon sa pasko.

Inig untop sa alas dose sa tungang gabi sa sugat sa Petsa beynte singko,
Magtapok ang tanan ug sa gawas para saksihan ang pagduslit sa mga pabuto,
Nga gina-andam ug giplastado ana palang buntag or kundi udto,
Ug sa pagduslit tanan makasaksi sa nagkadaiyang kolor nga sa langit mambuto.

Katawa ug hudyaka ang mopasuabi sa panahon sa pasko sa mga kabalayan,
Kay kini man ang adlaw nga ang tanan dasig sa nga gipangandaman,
Magamay ug dako man ang hekay nga napreparar sa kakusinahan,
Ang importante nagkapundok ug nagkasinabot ang tanan.