Balak-Bisaya: Determinasyon

Kinutlo sa mga kasakit ug tutalighay sa kapanahunan,
Inanod sa bunug sa mga balod sa kapalaran,
Dinaget sa mga lusay nga nagdayangdayang sa kalawakan,
Ug binanlas sa daplin sa halapad nga kabaybayonan.

Ang sulog niining mga kasinatiang natagamtaman,
Nagpalig-on sa mahuyang nga balatian.
Nihulma sa matag tawo nga nagpabiling lig-on,
Ngadto sa usa ka klase nga sumbanan sa kabatan-onan.

Kinulit pinaagi sa mga kalisdanang naagian,
Maoy pruweba maong karon nagmalampuson,
Nagpadayun sa pagkab-ot sa mga pangandoy,
Nga sukad sa bata pa ginahandom nga maangkin.