Balak Bisaya: Nakulet nga Hulagway

 

Nag-inusara sa daplin sa baybayon samtang nagsud-ong sa mga balod,
Nag-aninaw sa kadasig sa balod sa paghampak niiini sa mga dagkong bato,
Samtang naay lusay nga nahipadpad ug nisugasong sa unos sa kadagatan,
Sa wala madugay nahi-anod kini sa daplin ug nahisuksok sa kabato-an.

Ako nidool, gianinag kun unsa nga klase kini nga lusay ug gikuha ko kini,
Gidala sa daplin para utingkayon ang hulma niini ug ang klase,
Miabot kini sa mga usa ka metro ug tunga ang gihitas-on,
Ug wla ko mahisayod sa kun unsa kini nga klase sa kahoy.

Samtang nagduki-duki sa mga nahulma nga mga desenyo sa maong lusay,
Naaninag ko ang daw nakulet nga hulagway sa usa ka babaye,
Nga nga sa pagkakita ko niini mipasiga sa akoang mga mata,
Kahugis niini ang hulagway sa kanhi ko nga hinigugmang nibiya na,
Ug sa akoa nagbilin ug dakong samad sa akoang dalughan.

Sa wala ko damha, nahikulet ang ngisi sa akoang mga ngabil,
Nigaan ang pamati ug daw nahuwasan sa dugay na nga kasakit,
Unsa man ning pagbatia nga akoang nabatyagan nga wala damha,
Daw nakalinggawas ako sa hadugay nga pagkapreso sa kasakit,
Ug diha diha, nibuhagay ang mga luha ning mga mata ko,
Dili tungod sa kasakit pero tungod sa kagaan ug kahupay nga naangkon,
Dala sa nakulet nga hulagway sa babaye nga pinalangga ko.