Balak-Bisaya: LDR

Sa matag takna nga milabay ug mga adlaw nga napopos,
Nagahandum sa kanunay sa gugmang natong natapos,
Wala ko mahisayri kung nganu wala ta mulantod ug magdugay,
Nga unta ikaw sa dalughan ko ginaampingan sa kanunay.

Gipangga ka sa pamaagi nga akoang nahibaloan, 
Ginatapiggan ang mga gutlo nga kita nagkauban,
Bisan pa sa kamatuorang gugma ta dili dayag sa kadaghanan,
Apan nagpabilin ta nga malig-on sa pagsagubang sa kalisdanan,
Nikabat ang relasyon ta ug usa ka tuig ug pipila ka bulan,
Apan sa kalit lang ikaw kanako mikalit lang ug totok ug mipadayag,
Nga gugma natong duha dili na anggay sa laing bulan magdungag,

Sa kalit lang mikisdong ang kapanganuran sa pagkadungog,
Ug daw usa ka boto sa bomba nga sa akoa nagpabungog,
Nga sa kaugatan ko nibawi sa mga nakahipos nga kusog,
Ug sa panghuna-huna ko nibadlis  sama sa kidlat milanoglanog.
Ang mga pulong mong masulob-ong nagpadayag sa pakigbulag,
Mga luha ko naglumba sa pagdagayday ug sa balatian nagpaungkag.

Kasakit ba hunahunaon nga ang atong ginasaw-ang kalipay ug higayon,
Wala damha nga ang panagkita na'to atong higayuna didto taposon.
Mga plano ko kanatong duha dili na matuman ug mapadayun,
Kay sa kalit ikaw nibuhi sa atong giampingang LDR nga relasyon.